作者: 醉愛諾基亞
大家好，無錯又係小弟，今日好想講下部 Nokia X20，話說小弟用消費券第一期嚟買既，好啦長話盡量短說，入正題，首先講下其實點解會買 Nokia X20，原因好多地方都話 Nokia X10無貨，咁唯有買 Nokia X20啦，你問小弟覺得部機如何？
坦白講，無咩特別，無咩值得一提，正正常常既一部機，好多人會話4系 U 喎，你覺得 ok 咩。講真部機真係唔慢，電量方面真係可以一日唔使充電。
一定好多人話，唔值俾呢個錢去買呢粒 U 囉，咁只可以講，係 Nokia 用錯左銷售策略，我用左部機影左啲相，朋友睇完，個個都話部機影既相好靚，好鐘意，問我買左幾錢？仲有既係問我打機得唔得？我即場叫佢自己試，佢話都幾好，幾順，而且我朋友話部機影相好靚，以呢個價位嚟講直頭係抵。
我話 Nokia 用錯策略係因為我俾大部份人睇完啲相都係有讚無彈就可以諗到啦，唔係話唔需要講粒 U 有幾好，而係從消費者角度諗，其實俾得呢個價係咪物有所值，係咪係行得順，但係 Nokia 只係著重左粒 U 其實好勁，唔好因為佢係4系就睇小佢。
講坦白，既然高通都已經放左呢粒 U 係4系列，都已經係事實，消費者亦唔會因為你講既野而改變對粒 U 既觀感。反而對一啲實質有改變既野會更令人改觀，而我可舉岀一個好真實既例子：有日小弟係屋企附近既茶餐廳食野既時候撞到一個朋友（佢係果粉），咁傾偈既時候佢就話想買多部機要平，因為返工時候用，咁佢知小弟以前賣電話，就問我，我話咁啱我最近買左部新機，我即刻俾左啲相佢睇，佢即時既反應係，嘩，啲相好靚，又問我用落點，咁我都如實咁回答左佢，之後佢就話反正岀去返工，去買左先返，就係咁佢就即刻買左部 Nokia X20。
講真心小弟覺得 Nokia 就係需要有呢啲野俾人覺得 Nokia 真係改變緊，但係今次佢就反而無好好利用，今次呢部機既改變，明明有樣咁好既 selling point 唔用，反而執著係一樣唔會令消費者有好感既野上面，呢個就係小弟話佢失策既地方。
仲有既係，而且你覺得啲做評測既人唔會將你部機做跑分嗎？到時佢哋發現粒 U，係過啲6系，甚至拍得住粒7系既時候，唔會幫你大做文章嗎？所以我覺得今次係失策唔係無原因。
(本文標題由 Man 所擬，專欄文章不代表 ManHungTech 立場)
ManHungTech 
發表迴響